ЖОўТЫ ДОМ.

Шаноўны дружа! Ці ведаеш ты, што ў любой краіне нашай планеты 10-15% людзей пакутуе ад псіхічнага захворвання? У нашай невялічкай дзяржаве такіх людзей болей за 100 тысяч. Калі чалавек атрымлівае псіхіятрычны дыягназ, жыццё яго цалкам становіцца іншым. Часта ў такога чалавека некуды знікаюць сябры, яго не разумеюць блізкія людзі, яго не прымаюць на працу… Калісьці ў Амерыцы, яшчэ ў мінулым стагоддзі, некалькі сяброў па няшчасці, якія прайшлі лячэнне ў псіхіятрычным шпіталі, сабраліся разам, каб стварыць службу самадапамогі, якая пасля атрымала назву Клубны дом “Фантан Хаус” . Зараз у свеце існуе каля 400 клубных дамоў, дзе людзі з псіхічным захворваннем вучацца па-новаму жыць па-за межамі шпіталя. Мінскі клубны дом “Адкрытая душа” – першы клубны дом у нашай краіне, які працуе па гэтай мадэлі, галоўны прынцып якой – прыняцце чалавека, як асобы, а не як хворага інваліда. У клубным доме людзі з псіхіятрычнымі праблемамі набываюць новыя веды, удзельнічаюць ва ўсіх справах “Адкрытай душы” на роўных з кіраўніцтвам, займаюцца творчасцю, разам праводзяць вольны час і проста сустракаюцца, каб пазбегнуць адзіноцтва.