Выстава жывапісу Уладзіміра Хадаровіча

Запрашаем у Нацыянальны мастацкі музей (Леніна, 20) на персанальную выставў мастака Уладзіміра Хадаровіча! Выстава будзе працаваць да 22 красавіка 2018. Кошт квітка у музей - 6 руб. Уладзімір Хадаровіч нарадзіўся ў 1947 г. у горадзе Слуцку. У 1977 г. скончыў аддзяленне станковага жывапісу Беларускага тэатральна-мастацкага інстытута (цяпер – Беларуская дзяржаўная акадэмія мастацтваў). Пастаянны ўдзельнік шматлікіх рэспубліканскіх і міжнародных выстаў. Лаўрэат першай прэміі рэспубліканскага конкурсу сярод жывапісцаў (1993). Творы мастака знаходзяцца ў Нацыянальным мастацкім музеі Рэспублікі Беларусь, Музеі сучаснага выяўленчага мастацтва (Мінск), а таксама ў прыватных калекцыях і галерэях як на радзіме, так і далёка за яе межамі – у Італіі, Англіі, Аўстрыі, Польшчы, Германіі і многіх іншых краінах. Уладзімір Хадаровіч – выдатны жывапісец, выдомы дзякуючы рэдкаму таленту тонкага каларыста, які ў сваёй творчасці арганічна спалучае дакладнасць натуры з глыбінёй духоўнага зместу культурнай спадчыны Беларусі. Працуючы ў розных жанрах, ён аддае перавагу нацюрморту, у якім нязменна прысутнічае блізкасць да вечных каштоўнасцей жыцця, сялянскага побыту і нацыянальных традыцый. Мастак распрацаваў сваю аўтарскую канцэпцыю сувязі з этнічнымі вытокамі праз прадметны сімвалізм. Жывапісная культура твораў Уладзіміра Хадаровіча ўражвае дасканалым майстэрствам. Пастозны, шматколерны, а месцамі нават рэльефны мазок на палатне зіхаціць серабрыстымі фарбамі. Старадрукі, кераміка, абразы, даматканыя ручнікі – гэта не проста рэчы, гэта культурны пласт, які мастак адлюстроўвае дзеля адраджэння нацыянальнай свядомасці праз сваю асабістую любоў да радзімы, да мастацтва. З гэткай жа любоўю піша мастак і краявіды. Сціплыя і лірычныя, яны, як ціхая песня, пяшчотныя і вельмі сугучныя ўнутранаму стану мастака. Са шматлікіх жывапісных палотнаў аўтара быццам зыходзіць водар духоўнасці – яны вабяць да сябе нейкім патаемным унутраным святлом, нясуць дабрыню. Да іх нібыта прагнеш прыпасці і наталіць смагу, як з чыстай незамутнёнай крыніцы. Набытыя шматлікімі музеямі і галерэямі творы Уладзіміра Хадаровіча ўносяць адметную рысу ў любую экспазіцыю. Мастацтвазнаўца Ларыса Бортнік