ТҰҒЫЛ

Тұғыл – Шығыс Қазақстан облысы Тарбағатай ауданындағы кент, кенттік әкімдіктің орталығы. 1997 жылға дейін Приозерный деп аталып келді. Аудан орталығы – Ақсуат ауылынан шығысқа қарай 110 км жерде, Зайсан көлінің Оңтүстік жағасындағы далалы өңірде орналасқан. Тұрғыны 7,1 мың адам (2005). Іргесі 1958 жылы өзен айлағы есебінде қаланды. Тұғыл аудандағы бірден-бір өнеркәсіп орталығы болып табылады. Мұнда республикалық маңызы бар балық өңдеу кәсіпорны, машина-трактор жөндеу шеберханасы, мұнай базасы, байланыс бөлімшесі, 2 орта мектеп, балабақша, мәдениет сарайы, кинотеатр, кітапханалар, аурухана, дәріхана бар. Тұғыл арқылы Зайсан – Георгиевка – Өскемен автомобиль жолы өтеді.