Святы Айцец Піа

Айцец Піа - Фрэнчэска Фарджонэ - нарадзіўся ў П'етрэльчыне 25 мая 1887 года, ва ўбогай і простай сям'і. Ад нараджэння быў слабым і хваравітым. На пятнадцатым годзе жыцця прысвяціў сябе служэнню Богу ў законе капуцынаў. Моцна прагнуў стаць святаром і наследаваць св. Францішка. У 1910 годзе прыняў святарскія пасвячэнні. Як законнік адзначаўся вялікім запалам і з адданасцю выконваў паслугу паяднання людзей з Богам у сакрамэнце споведзі. Шмат маліўся і адначасова перажываў таямнічыя пакуты ды цярпенні. Лекары не маглі знайсці прычыны захворвання. У 1918 годзе падчас малітвы на хорах атрымаў стыгматы - знакі пяці ранаў Хрыста. Ён быў надзвычайным апосталам малітвы за грэшнікаў, ахвяроўваў за іх свае цярпенні. Заснаваў Групы Малітваў - аб'яднанне рэлігійных асобаў, молячыхся за Касцёл і за навяртанне грэшнікаў. Піа памёр у Сан Джаванні Ратонда 23 верасня 1968 года - у пяцідзесяцігоддзе з дня атрымання стыгматаў, якія зажылі незадоўга да смерці. Падрэ Піа кананізаваны 16 чэрвеня 2002 года.