Сустрэча прэс-клуба ў Віцебску

Як актывістам зацікавіць прэсу сваімі кампаніямі, а журналісту ўбачыць сярод мноства падзеяў сацыяльна значную з’яву, каб разам выклікаць шырокі рэзананс у грамадстве? Абмеркаваць гэтыя важныя пытанні запрашаюць журналістаў і грамадскіх актывістаў Віцебшчыны Грамадская культурніцкая кампанія “Будзьма беларусамі!” і Цэнтр даследавання грамадскага кіравання “СІМПА”. Прэс-клуб, на сустрэчы якога важнае меркаванне кожнага, адбудзецца 23 студзеня ў Віцебску. Мэта прэс-клуба – пачуць і зразумець адно аднаго, каб наладзіць дыялог паміж тымі, хто актыўна працуе дзеля паляпшэнняў у грамадстве, і прэсай, якая абірае, пра якую падзею напісаць, а якая не вартая і згадкі. На сустрэчу, каб падзяліцца сваім досведам, разам абмеркаваць памылкі і поспехі, збяруцца тыя, хто мае за плячыма не адзін выпадак стварэння і асвятлення падзеяў, якія дзякуючы гэтаму мелі шырокі рэзананс: Сяргей Сахараў (Мінск), галоўны рэдактар інтэрнэт-часопіса пра Мінск CityDog.by; Вікторыя Дашкевіч (Віцебск), журналіст анлайн-газеты “Народныя навіны Віцебска” і таварыства “Зялёная сетка”; Вольга Бізікава, (Віцебск), грамадская актывістка, дырэктар сацыяльнай культурнай установы Vitebsk4Me (“Віцебск для мяне”); Галляш Сялява (Браслаў), рэдактар парталу Браслаўскага рэгіёна braslaw.by. Прэс-клуб дае магчымасць кожнаму ўдзельніку выказаць сваё меркаванне. Вы – грамадскі актывіст, ладзіце цікавыя мерапрыемствы,абараняеце і прасоўваеце грамадскія інтарэсы і пра вас не піша прэса? Спытайце, чаму! Вы – журналіст, і грамадскія актывісты дасылаюць вам няўцямныя прэс-рэлізы і нецікавыя запрашэнні? Падзяліцеся, якія падзеі і чаму гатовае асвятляць вашае выданне! Падрабязнасці і рэгістрацыя тут: http://budzma.by/afisha/sustrecha-pres-kluba-zhurnalisty-i-aktyvisty-vicyebshchyny-yak-byc-karysnymi-adzin-adnamu.html