Спектакль "Маё сэрца б'ецца"

15 чэрвеня 2013 г. у КЗ «Мінск» у межах праекту «У абарону жыцця» адбудзецца спектакль «Маё сэрца б’ецца». Гэты праект упершыню стартаваў 9 год таму, у яго фармаце адбылося шмат разнастайных конкурсаў і імпрэз. Прэм’ера спектаклю «Маё сэрца б’ецца», пастаўленага рэжысёрам і акторам Паўлам Харланчуком, адбылася ў 2009 г. і мела вялікі посьпех. Пасля шэрагу аншлагаў у Маладзёжным тэатры эстрады спетакль цяпер выходзіць на вялікую сцэну КЗ «Мінск». «Маё сэрца б’ецца» – гэта дзьве гісторыі, якія пераплятаюцца адна з другой. У нябеснай школцы дзеці, якія яшчэ не нарадзіліся, спасцігаюць такія навукі, як дзіцячая непасрэднасць, бацькоўская логіка, засвойваюць лексіку нованароджанага і з нецярплівасьцю чакаюць свой «выпускны»- сустрэчу з бацькамі. У гэты час маладая сям’я Кастуся і Ганны стаіць перад выбарам: пазбавіцца ад дзіцяці, якога яны чакаюць, ці захаваць маленькае жыццё? У пастаноўцы гучыць цудоўная музыка аўтара і кампазітара Алёны Сітнік. Ролі дарослых выконваюць вядомыя акторы – Павал і Ганна Харланчук, Ганна Хітрык і іншыя. Ролі дзяцей выконваюць… дзеці. З часоў прэм’ернага паказа маленькія акторы выраслі і на змену ім прыйшлі новыя хлопчыкі і дзяўчынкі. Пастаноўка разлічаная на шырокую аўдыторыю – нас чакаюць добры гумар і прыгожая музыка, слёзы і смутак. Усё гэта не пакіне нікога абыякавым, і мы ўпэўненыя, прымусіць задумацца пра няпростыя рэчы. А гэта можа зрабіць гэты свет лепшым.