Песні філаматаў і філарэтаў

Мэта праекта – папулярызацыя творчай спадчыны сяброў таемных таварыстваў філаматаў і філарэтаў (А.Міцкевіч, Я.Чачот, Т.Зан, І.Дамейка, А.Адынец і інш.), увядзенне яе ў сучасны кантэкст беларускай літаратуры і культуры, узбагачэнне традыцый беларускага студэнцтва, узнаўленне ідэалаў і каштоўнасцяў выбітных прадстаўнікоў ліцвінскай / беларускай шляхты першай паловы 19 стагоддзя, найперш дзеля выхавання моладзі ў духу патрыятызму, сумлення і імкнення да асветы. Галоўная ідэя праекта – наблізіць асобы філаматаў і філарэтаў і іх творчасць да сучаснага беларускага гледача / слухача праз сінтэз паэзіі, аўтэнтычнай музыкі, перформансу, візуальных вобразаў. Важная роля адводзіцца актыўнаму дыялогу з публікай, якая мусіць уцягвацца ў дзеянне, найперш, спяваючы разам з выканаўцамі (тэксты песняў раздаюцца падчас імпрэзы). Надзяляецца ўвага гістарычным дэталям, якія дапамагаюць лепей уявіць каларыт эпохі і стыль жыцця філаматаў і філарэтаў. Асноўныя крыніцы: рукапісны нотны сшытак Б.Свентажэцкай (1855 г., апрацоўка С.Немагай), зборнік “Філаматы і філарэты”, укладальнік К.Цвірка, выдавецтва “Беларускі кнігазбор”, 1999 год.