МОВАВЕДА Ў ЗАМЕЖЖЫ

Шаноўнае спадарства! НОВЫ СЭЗОН "МОВАВЕДА - КЫІЎ" МЯНЯЕ ФАРМАТ І НАЗВУ НА "МОВАВЕДА Ў ЗАМЕЖЖЫ" :)) Мае шаноўныя ўкраінскія сябры! Улічваючы новыя абставіны жыцьця (вяртаньне ў Менск), я не змагу зьяўляцца ў Кыіве на курсы нават раз на месяц, але ні ў якім разе вас не кідаю. Як мы й плянавалі, калі нашую справу не падхопяць новыя беларусы-энтузыясты ў Кыіве - фізычна, дык памяняйма наш фармат на... ВІРТУАЛЬНЫ!!! :))))) Такім парадкам, прапаную скарэгаваць і нашую назву, паколькі цяпер гэтая старонка будзе дапамагаць у вывучэньні беларускае мовы ня толькі ўкраінцам, але і іншым замежнікам (запрашаю ў сябрыну слухачоў Летняе школы беларусістыкі 2015 і маіх будучых студэнтаў-замежнікаў, якія зьявяцца ў нас неўзабаве)). Карыснай будзе нашая старонка й беларусам! Запрашаюцца да супрацы выбітныя замежныя дзеячы (найперш пісьменьнікі й перакладчыкі), якія здаўна цікавяцца Беларусьсю, яе моваю ды культураю, а таксама вядомыя беларускія дзеячы (літаратары, мастакі, музыкі, навукоўцы, журналісты), якія жывуць альбо гасьцююць у замежжы. Форма заняткаў - традыцыйна моўная й творча культуралягічная. Канцэпцыя курсаў - стварэньне культурніцкае пляцоўкі "БЕЛАРУСЬ па-за межамі МУРОЎ": муроў фізычных і мэтафізычных, наяўных і ўяўных, духовых і інтэлектуальных. Выкладае: Надзя Старавойтава, дацэнт БДЭУ, мэдыявіст, літаратарка. Шчыра запрашаем УСІХ неабыякавых да Беларушчыны асобаў! Выпраменьвайма творчасьць на кожным кроку, як калісьці пра тое марыў беларускі філёзаф Ігнат Абдзіраловіч: "Чалавечая душа, што прыйшла ў сьвет адбіць радасьць ігры жыцьцёвых косаў, напіцца іх цяплом і ласкай, павінна разьвярнуць усю моц свае творчасьці, каб зьліцца ў творчым тэмпе сусьветнага дыханьня, сусьветнай гармоніі, прысутнасьць якой адчувалі зорныя душы пітагарэйцаў, каб потым у жыцьцявым стамленьні схіліцца ўзноў на ўлоньне вялікай Маткі-Матэрыі, Маткі-Невыразнасьці, Маткі-Непачатасьці, поўнай сілы й моцы, поўнай смутку й нераджонага жыцьця… Цяпер жыцьцё поўна нядолі, бо мы ня ўмеем быць тварцамі… Сапраўднай падставай жыцьця можа быць толькі творчасьць. Творчасьць на кожным кроку: у штодзённай працы, у сямейных адносінах, у грамадзкім руху”. Пашырайма кола БЕЛАРУСКАЕ МОВЫ - нашага КРЫВІЦКАГА САЛЯРЫСУ! :)