Лялечны тэатар "БуСемаПа"

Пра нас: “БуСемаПа” – гэта суполка сяброў, якія займаюцца любімай справай, робяць гэта с задавальненнем і на радасць людзям. Праект утварыўся ў красавіку 2013 года, калі мастакі, паэтка, дызайнер, журналіст і іх сябры засумавалі. У той жа момант яны вырашылі больш ніколі не губляць сваю ўсмешку. Удзельнікі самі прыдумляюць гісторыю, ствараюць да яе лялькі, самастойна робяць тэатральную пастаноўку і потым паказваюць яе дзецям і дарослым. Прэз-рэліз "Гісторыя пра Жака і Густава"(спектакль на рускай мове): Далёкія Далі, Невядомыя далі, Завоблачныя далі... Хто не марыў патрапіць туды?! Каго туды не прыводзілі мары? Вось і нашыя сябры, хлопчык Густаў і трохколавы ровар Жак, імкнуцца ў далі, мрояць аб іх, бачаць іх у сне і наяве. Густаў і Жак вырашылі ў што б там ні стала патрапіць туды. Але ж як? Аб гэтым распавядзе гэта дзівосная гісторыя - спектакль. Усаджвайцеся, укладвайцеся, уладкоўвайцеся пазручней на мяккія падушкі і рыхтуйцеся накіравацца з галоўнымі героямі ў займальнае падарожжа! Прэз-рэліз "Як Бусемапка ўсмешку шукала"(спектакль на беларускай мове): Ці бывае так, каб людзі раптоўна смяяцца развучыліся? Каб птушкі больш не спявалі, і кветкі не распускаліся? Што ж тады рабіць і дзе ж шукаць страчаную радасць? Маленькая дзяўчынка-гарэзніца Бусемапка адпраўляецца ў небяспечнае падарожжа на пошукі ўсмешкі, якая аднойчы знікла, здаецца, назаўжды. Гэта чароўная гісторыя адбылася ў тыя старажытныя часы, калi нашу зямлю на сваiх спiнах трымалi вялiзарныя i моцныя сланы, якiя ў сваю чаргу стаялi на панцыры ў адной вялізнай чарапахi. І яе вам распавядаюць і паказваюць удзельнікі аматарскага тэатра “БуСемаПа”.