ЛІЦВІНЫ

Афіцыйная старонка фальклорнага гурта "Ліцвіны" Увосень 1987 года ўпершыню сустрэліся Наталля Матыліцкая і Ўладзімір Бярбераў, які шукаў салістку для свайго музычнага праекта. Наталля, родам са Случчыны, толькі пачынала спрабаваць сябе ў народных спевах, пераняўшы манеру ад вясковых бабуль і закахаўшыся ў гэтае мастацтва. Уладзімір тады толькі пачынаў самастойную працу па вывучэнні народных інструментаў і музычнага фальклору, каб стварыць гурт, заснаваны на сапраўдных, музейных, узорах народнага інструментарыю, адзення і выканальніцтва, "жывы працяг музею". Погляды абодвух на музычны фальклор супалі, і праз год дуэт дэбютаваў на сцэне менскага Дома літаратара. У 1990 годзе да дуэта далучіліся Ксенія Дзягілева - скрыпачка з талентам да імправізацыі, і Мікола Трус - тэнар, родам са Слонімшчыны. Тым жа летам гурт узяў назву "Ліцвіны" - у памяць пра "залаты век" нашай гісторыі - перыяд Вялікага княства Літоўскага. Назва гурта на іншых мовах: The Litwins - English; die Litwinen - Deutch; Licwiny - polski; Литвины - русский; Литвините - български; i Litvini - italiano.