Кірмаш праектаў у Гомелі 2 - цяпер музычны!

“Будзьма беларусамі!” абвяшчае пошук музычных праектаў! Новы “Кірмаш праектаў” адбудзецца ў Гомелі 17 кастрычніка і будзе прысвечаны музычным праектам. Мерапрыемства адбудзецца ў канферэнц-залі гатэля "Замкавы". Пачатак а 18:00. Прыходзьце самі і запрашайце сяброў! “Кірмаш праектаў” — гэта публічныя прэзентацыі ў фармаце “маланкавай размовы”, месца сустрэчы таленавітых, прадпрымальных, актыўных людзей, якія жывуць цікавымі культурніцкімі ідэямі, маюць або хочуць займець досвед у іх рэалізацыі, адкрытыя да пашырэння сваіх прафесійных ведаў і кола знаёмстваў. Першы “Кірмаш” у Гомелі адбыўся 4 красавіка гэтага года і прадэманстраваў 11 праектаў розных накірункаў: ад арт-хаўса і цырка да арт-вёскі і пешаходнай вуліцы. Гэтым разам у цэнтры ўвагі “Кірмашу”, які адбудзецца ў Гомелі 17 кастрычніка, — музыка. А значыць, у пошук абвяшчаюцца: • Грамадска значныя музычныя праекты, падзеі, канцэпцыі, стратэгіі (напрыклад, фармавання музычнай, стылёвай адметнасці ўстановы) і іншае. Вітаюцца як гісторыі “праходу” праекта праз агонь, ваду і медныя трубы, так і ідэі, якія толькі-толькі нарадзіліся і якія не зашкодзіць “абкатаць” у коле калег, аднадумцаў і многіх пакуль не ідэнтыфікаваных”, але ўжо неабыякавых людзей. • Аўтары музычных праектаў: музыкі, арганізатары канцэртаў, арт-дырэктары, кіраўнікі навучальных музычных установаў і многія іншыя, хто ідзе па жыцці з музыкай. • Шырокая публіка. Асаблівыя прыкметы: зацікаўленасць у паляпшэнні якасці і росце колькасці музычных падзей. Фармат: “маланкавая размова” — гэта некалькі 5-хвілінных прэзентацый, створаных загадзя ў PowerPoint, Prezi.com і г.д. “Кірмаш праектаў” уключае таксама абмеркаванне прадстаўленых праектаў і галасаванне за найлепшы. Навошта такая сустрэча? Адмыслоўцам у музычнай сферы “Кірмаш праектаў” будзе карысны, каб падзяліцца цікавым, каштоўным досведам, атрымаць ацэнку калег, пачаткоўцам — прадставіць новыя ідэі і, галоўнае, знайсці партнёраў для іх рэалізацыі! Гледачы (сярод якіх таксама будзе нямала адмыслоўцаў) могуць натхніцца творчым арганізацыйным запалам, даць парады, узяць удзел у рэалізацыі таго ці іншага культурніцкага праекта. Каб стаць удзельнікам “Кірмашу праектаў”, неабходна да 13 кастрычніка ўключна даслаць на электронную скрыню kirmash.homel@gmail.com прэзентацыю, у якую абавязкова ўключыць: — назву прэзентацыі*; — сутнасць прэзентацыі (што менавіта вы хочаце прадставіць: праект, стратэгію, кампанію, канцэпцыю і г.д.)*. Для праектных ідэй і канцэпцый: — мэты і задачы (чаму і каму гэты праект неабходны); — фармат праекта, яго ўнікальнасць і (ці) неабходнасць; — калі і дзе ідэя мусіць рэалізавацца; — якія рэсурсы вы ўжо маеце і якія шукаеце (каманда, дзеянні, партнёры, бюджэт). Для рэалізаваных праектаў таксама: — вашыя поспехі і цяжкасці ў рэалізацыі; — як вы бачыце развіццё праекта ў будучыні. Для канцэпцый ці стратэгіі: — апісанне: сутнасць, бачанне; — мэтавыя аўдыторыі. Больш падрабязна пра падрыхтоўку прэзентацыі для “Кірмашу праектаў” можна даведацца тут. Таксама з усімі пытаннямі звяртайцеся да каардынатара кампаніі “Будзьма беларусамі!” па Гомельскім рэгіёне Яўгена Меркіса (тэл: +37544 7494166).