HAY.BY

Якасныя і ўнікальныя гадзіннікі з беларускімі і армянскімі ўзорамі. Лімітаваная серыя. Зроблена ў Беларусі. Hay.By (Хай.Бай) – гэта сяброўскі беларуска-армянскі праект, заснаваны на тым агульным, што маюць два народы: на любові да сваёй зямлі, да сваёй спадчыны, мовы і сімвалаў. Падавалася, што можа аб’ядноўваць два такіх далёкіх народа, апроч савецкага мінулага? Мы спрабуем знайсці агульныя кропкі не толькі ў сённяшнім дні, але і далёка ў гісторыі. Хто з вас, прыкладам, ведаў, што знакамітыя Слуцкія паясы, што з’яўляюцца гонарам беларускага народа, слуцкіх майстрыц вучыў ткаць армянін Ян Маджарскі (Аванэс Маджаранц) – вядомы майстра, запрошаны князямі Радзівіламі. Праект Hay.By узнік спантанна, можна сказаць, за сяброўскай гутаркай аб ідэі стварыць калекцыю гадзіннікаў з беларускімі і армянскімі сімваламі. Так у супрацы з Мінскім гадзіннікавым заводам “Луч” з’явіліся лімітаваныя серыі “Спадчына” і “Маштоц”. Дарэчы, цікавы факт: механізм гадзінніка на вежы мінскага завода “Луч” быў выраблены ў Ерэване. Чаму Hay.By пачаўся менавіта з гадзінніка? Таму што для нас гэта не проста зручнае ўпрыгожванне, а адлюстраванне часу, які мы жадаем прысвяціць таму, каб болей даведацца пра сябе і адзін аднаго. Мы таксама верым, што сімвалы на нашых гадзінніках сапраўды маюць моц, бо ў кожным з іх зашыфраваны старажытны код роднай зямлі. І наш лагатып – не выпадковы набор знакаў. Гранат – адзін з ключавых сімвалаў Арменіі, які азначае ўрадлівасць і багацце. Унутры яго – беларускі сімвал урадлівай зямлі, добрага ўраджаю і вялікай сям’і. Мы спадзяемся, што вам спадабалася наша першая калекцыя гадзіннікаў і што ў хуткім часе мы зможам прапанаваць вам яшчэ больш цікавага!