Фестываль «Pradmova» | Мінск | 04-07.04 @ OK 16

4-7 красавіка 2019 года адбудзецца фестываль інтэлектуальнай кнігі «Pradmova». Лекцыі, майстар-класы, дзіцячая праграма, выставы, спектаклі, дэгустацыі, літаратурная ноч і кінапаказы – на фэсце знойдуцца імпрэзы для аматараў усіх літаратурных жанраў. АДКРЫЦЦЁ ФЭСТА Стартуе фэст 4 красавіка глабальным пытаннем: “Што ж такое беларуская літаратура?”. Сваім бачаннем падзеляцца знакавыя аўтары сучаснасці Альгерд Бахарэвіч, Людміла Рублеўская, Марыя Мартысевіч і Алесь Разанаў. А працягнецца вечар успамінамі пра чалавека-легенду, загадкавага героя беларускага культурнага падполля Кіма Хадзеева. ЗАМЕЖНЫЯ ЛІТАРАТУРНЫЯ ЗОРКІ Упершыню ў Менск прыедзе фінска-эстонская пісьменніца Софі Оксанен, таксама выступяць расейскі пісьменнік, літаратуразнаўца, тэле- і радыёвядоўца Віктар Ерафееў, літоўскі паэт ды інтэлектуал Томас Венцлава, а зорка ўкраінскай літаратуры Сяргей Жадан з’явіцца на фэсце віртуальна – падчас прэзентацыі рамана “Інтэрнат” у беларускім перакладзе. ДЫСКУСІІ Самы папулярны фармат сёлетняй “Прадмовы” – у праграме больш за 20 дыскусій. Ці ўплываюць на пісьменніка-гуманітарыя дакладныя навукі? Пра што нельга пісаць дзіцячым аўтарам? Як развіваецца жаночая літаратура? І якім чынам раман ператвараецца ў спектакль? – вось толькі некаторыя тэмы спрэчак, у якіх, магчыма, народзіцца ісціна. ДЗІЦЯЧАЯ ПРАГРАМА Інтэлектуальная кніга і для самых маленькіх! 6 красавіка на “Прадмове” дзіцячы дзень. Майстар-клас пра птушак, касцюмаваныя чытанні любімых казак, а таксама цэлы забаўляльны міні-фэст для малых і дарослых з печывам і напоямі ў межах прэміі Цёткі. ЛЕКЦЫІ, ЧЫТАННІ, КНІЖНЫЯ ПРЭЗЕНТАЦЫІ Беларускія навінкі ды бестсэлеры на “Прадмове” прэзентуюць аўтары. Кнігі тут жа можна набыць і атрымаць аўтограф - выдаўцы і кнігарні разгарнуць на фэсце кірмаш. На фестывалі будзе арганізавана выстава-продаж інтэлектуальнай літаратуры і літаратуры non-fiction ад кнігарні "Акадэмкніга", выдавецтваў "Галіяфы", "Логвінаў", "Янушкевіч", "Коска", "Тэхналогія", "Эканомпрэс", "Лімарыюс", "Макбел", выдаўцоў Рамана Цымберава і Зміцера Коласа. Праграма фэсту: глядзі і выбірай, на што пойдзеш: http://pradmova.by/papyarednyaya-pragrama-festyvalju-intelektualnaj-knigi-pradmova-minsku-4-7-04-2019/ А тэатральная праграма фэста тут: https://tinyurl.com/yyc8v5z6 Кантакт для сувязі: pradmova@gmail.com