Дзеткі Сонца

Таварыства Сяброў Дзетак Сонца ўзнікла ў 2008 г. для падтрымкі Місіі Камерун (www.misja-kamerun.pl), якая ўжо больш за 20 гадоў аказвае дапамогу камерунскім дзецям у Бертуа і Яундэ. На дадзены момант Таварыства апякуецца дзіцячым домам Ачаг Св. Дамініка (Foyer St. Dominique) і фінансуе адукацыю некалькіх дзесяткаў дзяцей і моладзі (ад дзіцячага садка да дактарантуры ўключна). Не ведаем, але, можа, менавіта пасля наведвання нашай пляцоўкі пад Бертуа Рышард Капусцінскі напісаў: «Варта толькі затрымацца дзе-небудзь у вёсцы, у мястэчку альбо нават проста ў полі – адразу з'явіцца грамадка дзяцей. Усе неапісальна абарваныя. Кашулі, сподні ў неверагодных лахманах. Іх адзіная маёмасць, адзіная ежа – тыквіна і крыху вады. Кожны кавалак булкі ці банана знікне, праглынуты ў долю секунды. Голад сярод гэтых дзяцей з'яўляецца чымсьці пастаянным, гэта форма жыцця, другая натура. Але тое, пра што яны просяць гэта не хлеб, гэта нават не грошы. Просяць аловак. Шарыкавы аловак, кошт – 10 цэнтаў. Так, але адкуль узяць гэтыя 10 цэнтаў? А яны ўсе хацелі б хадзіць у школу, хацелі б вучыцца» (Рышард Капусцінскі, «Хэбан»).