БУМ-БАМ-ЛІТ

Творчы рух беларускіх авангардыстаў "Бум-Бам-Літ", утвораны ў 1995 г. Вядомы сваімі літаратурна-музычнымі імпрэзамі, мастацкімі акцыямі, пэрформансамі. "Першы авангардовы рух у беларускай літаратуры, які значна зьмяніў усеагульнае пра яе уяўленьне. У кансэрватыўны і прасякнуты канвэнцыямі белліт прыйшла кампанія шызанутых хлопцаў, ад выгляду якіх у нашых клясыкаў наэлектрызоўваліся іх бронзавыя вусы. Пантэон-нэкропаль стаў месцам вечарынак і танцаў. Але найцікавейшыя акцыі ББЛ, – накшталт чытаньня вершаў жывёлам і заснаваньня беларускай калёніі ў Афрыцы – так і не былі рэалізаваныя" (з афішы фэстывалю "НЕфармат", прымеркаванага да 15-годзьдзя Бум-Бам-Літу", 30.11.2011). З бум-бам-літаўскага асяродку "вылупіліся" пэрформэр-групы "Тэатар псыхічнае неўраўнаважанасьці", "Спэцбрыгада афрыканскіх братоў", літаратурная суполка "Sсhmerzwerk". Выданьне кніжнай сэрыі "Бібліятэка Бум-Бам-Літа" распачалося ў 1998 г. выхадам калектыўнага зборніка "Тазік беларускі".