Башҡорт йәштәре көндәре - 2019!

Алдынғы ҡарашлы, маҡсатлы, илһөйәр башҡорт йәштәрен оло ҡорға йыябыҙ! "Башҡорт" йәмәғәт ойошмаһы тарафынан үткәрелгән "Башҡорт йәштәре көндәре - 2019" Йылайыр районы Юлдыбай ауылы эргәһендә буласаҡ! Башҡорт йәштәрен берләштереүсе был сара өс көн дауамында - 12, 13, 14 июлдә хозур тәбиғәт ҡосағында үтәсәк. Данлы тарихыбыҙға яңы күҙлектән бағып, халҡыбыҙҙың бай мираҫына – йолаларына, ғөрөф-ғәҙәттәренә таянып әҙерләнгән сараға барлыҡ башҡорт йәмәғәт ойошмалары,район вәкилдәре, яҡташтар берлеге, республиканан һәм Рәсәй төбәктәренән рухлы йәштәр саҡырыла. Күңелле уйындар, мауыҡтырғыс тамаша, башҡорт халҡының һәм Башҡортостандың артабанғы үҫеш мәсъәләләрен хәл итеүгә арналған түңәрәк өҫтәлдәр, спорт ярыштары, усаҡ янында гитара, ҡурай моңо һәм эстрада йондоҙҙары сығышы - былар барыһы ла тик һеҙҙең өсөн әҙерләнгән! Әгәр ҙә һинең күңелең дәрт-дарманға ташһа, Башҡортостан өсөн янып-көйһә, хозур тәбиғәт ҡосағында ял итергә теләһәң, Башҡорт йәштәре көндәренә рәхим ит! Иҫ киткес саранан ситтә ҡалмағыҙ!