Андрэй Мельнікаў ┃ Andrey Mielnikaw

Андрэй Мельнікаў - беларускі бард, літаратар. Пераможца фэстываляў «Залатая горка-1994», «Бардаўская восень» (1996 год), 30-га гіт-параду радыё «Свабода» (1994) і інш., аўтар больш за 2 дзясяткі альбомаў на тэму нацыянальнага адраджэння і жыцця ў постсавецкіх рэаліях, заснавальнік фэстываляў беларускай аўтарскай песні і паэзіі «Аршанская бітва», «Талькаўскі фэст», «Гэта МЫ». Нарадзіўся ў горадзе Гомелі 24 лістапада 1965 года. Пачаў творчую дзейнасць у канцы 80-ых гадоў. Нацыянальна арыентаваная творчасць барда знайшла свайго слухача, у 90-ых альбомы барда прадаваліся тысячнымі накладамі, бард асаблівую ўвагу звярнуў на падзеі і постаці, якія былі невядомыя шырокім колам насельніцтва: Аршанская бітва, Слуцкі збройны чын, постаць С.Булак-Булаховіча і інш. Запісаў асобны альбом на вершы паэтаў "у выгнанні"("Песьні выгнаньня"). Пік творчасці выпаў на сярэдзіну 90-ых гадоў: 13 кастрычніка 1996 году выйшаў альбом «Гэта МЫ». Песні альбома — гэта адлюстраванне падзей першых гадоў незалежнасці Беларусі. Песня «Гэта Мы» з аднайменнага альбома стала гімнам патрыятычнай моладзі тых часоў. Праз некалькі гадоў песня выйшла ў рокавай аранжыроўцы ў выканні гурта "Новае неба" з Касяй Камоцкай. У 1996 годзе Андрэй Мельнікаў перамагае на фэсце "Бардаўская восень", сярод удзельнікаў якога быў таксама вядомы беларускі музыкант Лявон Вольскі ("Zet", "Мроя", "N.R.M", "Volski"). Пасля перамогі на "Бардаўскай восені" Андрэй Мельнікаў запісвае альбом "Шлях" у горадзе Беластоку на студыі "Rembrant". У альбом увайшлі песні з ранейшых альбомаў, невядомых польскаму слухачу. Увогуле, Андрэй Мельнікаў запрашаўся ў Польшчу і ў 1990,1991 і 1992 годзе на фэстываль "Басовішча", а таксама ў 1994 і 1995 годзе на фэстываль "Бардаўская восень", але па розных абставінах трапіць на іх не атрымалася. Але ж пазней у барда атрымаўся выніковы 1996 год. У 1997 годзе Андрэй Мельнікаў выступіў са сваім гуртом "Каларада бітлз" у клубе "Рыф" у Мінску. Гэта быў новы крок у творчасці, але ж, на жаль, канцэрт стаў адзіным для гурта. У 1997 годзе Андрэй Мельнікаў трапляе за краты за "незаконны пераход мяжы", што вызвала яшчэ адну хвалю цікавасці да творчасці барда. У вынікі прыбывання за кратамі свет пабачыла аповесць "Выжывае падлейшы", што выйшла ў часопісе "Arche". У 90-ыя гады бард таксама з'яўляўся голасам розных апазыцыйных партый: яго песні часта можна была пачуць на розных мітынгах, з'ездах і г.д. Выступае і па сённяшні дзень: дае канцэрты па Беларусі і бліжняму замежжы. Група створана з мэтай інфармавання пра творчасць барда Андрэя Мельнікава. Калі ў вас ёсць нейкія відэа,фота з выступаў барда Андрэя Мельнікава,то дасылайце іх нам,будзем удзячныя. Вялікую каштоўнасць маюць фота і відэа з канца 80-ых, 90-ых,пачатку 2000-ых.