Абвесці БНР унутры сябе!

25 сакавіка 1918 года, 95 год таму, самыя выбітныя сыны сваёй Радзімы абвесцілі незалежнасць Беларускай Народнай Рэспублікі – краіны, якая кіравалася беларусамі дзеля беларусаў. Зараз мы ведаем гэтую дату як “Дзень Волі” і святкуем яе кожны год 25 сакавіка. Пакуль (але толькі пакуль) Дзень Волі – не дзяржаўнае свята, аднак ад гэтага яно не перастае быць Народным. Хоць на сучасных мапах няма краіны з назвай БНР, яна па-ранейшаму існуе. Існуе ў сэрцах тых беларусаў, якія адрадзілі гэтую дзяржаву ўнутры сябе , захаваўшы родную мову,культуру і гісторыю. Калі і ты зноў абвесціш БНР унутры сябе, тады і Рэспубліка Беларусь стане зноў народнай! З ДНЁМ ВОЛІ! АРР "Дзедзіч" прапануе ўсім ахвотным адзначыць Дзень Волі гульнёй па гарадскім арыентаванні "БНР і Берасце". Запрашаем усіх ахвотных - індывідуальна ці камандай. Лепшых арыенціроўшчыкаў чакаюць прызы, а усіх удзельнікаў - сюрпрызы:) Праграма святкавання Дня Волі. Нядзеля, 24 сакавіка. 12:00 – Трышынскія могілкі. Збор удзельнікаў і экскурсія. Ускладанне кветак да помніка аднаго з дзеячоў БНР Адама Трыпуса, да помніка ахвярам палітычных рэпрэсій. 12:30 – 15:30 – Гульня па гарадскім арыентаванні “БНР і Берасце” (падрабязнае апісанне будзе дададзена пазней). 15:30- 17:00 – Падвядзенне вынікаў гульні, узнагароджванне пераможцаў, кава-гарбата (офіс АРР "Дзедзіч"). Усе ўдзельнікі атрымаюць святочныя паштоўкі "З Днём Волі", якія можна будзе даслаць па пошце сябрам і знаёмым, павіншаваўшы іх з галоўным святам Незалежнасці Беларусі. Гульня “БНР-Берасце”. Пасля экскурсіі па Трышынскіх могілках удзельнікі дзеляцца на каманды да 5 чалавек. Старт адначасовы ад выхаду з могілак. У кожнай каманды свой маршрут. На маршруце неабходна знайсці замаскіраваныя кропкі-пікеты. На кропцы-пікеце ўдзельнікі шукаюць заданне і мапу з пазначаным раёнам пошуку наступнага пікету. Першую мапу і заданне вядоўцы выдаюць на старце. Яны ж патлумачаць і прадэманструюць знешні выгляд пікетаў, прыклады месцаў, дзе могуць быць схаваныя заданні. Калі каманда не можа знайсці пікет, ёсць бонус – падказка вядоўцы, якой можна скарыстацца толькі адзін раз. Карыстацца роварам ці аўтамабілем забаронена. У гульне ёсць кантрольны час – 15:30, гэта значыць, што усе каманды павінны прыбыць на канчатковы пункт да гэтага часу. Каманда, якая прыйдзе на канчатковы пункт першай і пры гэтым расшукае ўсе пікеты, атрымлівае прыз. Каб перамагчы ў гульне, патрэбны не толькі хуткасць і ўменне арыентавацца ў горадзе, а таксама веданне элементарных фактаў з гісторыі Беларускай Народнай Рэспублікі. Пазнаёміцца з імі можна, напрыклад, тут: 25 пытанняў і адказаў з гісторыі БНР (Фота) http://charter97.org/be/news/2010/3/25/27602/.