20 верасня - да Язэпа Драздовіча на Глыбоччыну

20 верасня 2014 года запрашаем вас на аўтарскую вандроўку па Глыбоччыне з вядомым краязнаўцам і музыкам Аляксеем Фраловым. Гэтым разам вандроўка будзе прысвечаная творчасці і зямлі вядомага беларускага мастака Язэпа Драздовіча, што паходзіць з Глыбоччыны, і ладзіцца да 60-годдзя яго смерці. Як заўжды, Вас чакае найцікавейшы маршрут па цудоўных мястэчках і архітэктурных шэдэўрах гэтага маляўнічага краю, а таксама невялічкі арганны канцэрт у адным з касцёлаў. Маршрут (~460 км): Мінск – Глыбокае – Удзела – Мосар – Шаркаўшчына – Германавічы – Лужкі – Мінск. Кошт экскурсіі: 285 000 руб./чал. Кампаніям у 4 чалавекі і больш, а таксама сталым удзельнікам нашых вандровак - зніжка. Запіс на вандроўку: па тэл. +375255458430, +375291342804 (Валерыя). Зоркавы талент беларускага мастака-рамантыка, фантазёра і фантаста Язэпа Драздовіча вырас з народных крыніц, а фарміраваўся пад уплывам старэйшых рамантыкаў - мастакоў і паэтаў, філаматаў і нашаніўцаў, асобаў геніяльнага празрэння, такіх як Міцкевіч і Купала, Рушчыц і Чурлёніс... "Наш маленькі павятовы Леанарда да Вінчы" -- празвалі яго сучасьнікі. А нарадзіўся мастак ці то на Полаччыне, ці то на Віленшчыне, а дакладней -- на Глыбоччыне, у "азёрным краі", куды і выпраўляецца наша вандроўка. Яе пункты размешчаныя на мапе так, як зоркі аднаго з сузор'яў, што "вісяць над намі на нябеснай цвердзі". А гэтае зямное сузор'е складаецца з шэдэўраў беларускай і сусветнай спадчыны - архітэктуры, жывапісу, дэкаратыўнага і паркавага мастацтва, прыроды. Гісторыя і легенды, гумар і паэзія будуць суправаджаць нас у сьвет прыўкраснага, у касьмічна-прыгожы сьвет Язэпа Драздовіча. Да нябёсаў нас ўздымуць барочныя вежы касцёлаў, багацце іх арыгінальных аўтэнтычных інтэр'ераў, сядзібныя паркі і прыродныя цуды, адзіны ў свеце Музей Драздовіча з яго ўнікальнай калекцыяй і стваральніцай... Падчас вандроўкі вы пабачыце: - найпрыгажэйшы узор віленскага барока былы касцёл кармелітаў ХVII - XVIII ст.ст.(цяпер сабор Нараджэння Прасвятой Багародзіцы) і будынкі былога кармеліцкага кляштару у Глыбокім; -позьнебарочны глыбоцкі касцёл Святой Тройцы; - будынкі колішняга базыльянскага манастыру ў Беразвеччы і іншую гістарычную забудову Глыбокага; - барочна-класіцыстычны касцёл Беззаганнага Зачацця Найсвяцейшай Панны Марыі ХVII - XVIII ст.ст. і кляштар францысканаў у мястэчку Ўдзела; - помнік стылю класіцызму касцёл Святой Ганны канца XVIII ст. у Мосары і цудоўныя касцельныя ваколіцы; - драўляную Царкву Успення Прасвятой Багародзіцы XVIII ст. – пач. XХ ст. ў Шаркаўшчыне; - яшчэ адзін помнік знакамітага віленскага барока Касцёл Перамянення Пана другой паловы XVIII ст. у Германавічах, а таксама шыкоўны палацава-паркавы ансамбль Шырынаў, у якім зараз месціцца музей Язэпа Драздовіча; - і напрыканцы самы шыкоўны шэдэўр віленскага барока касцёл Міхаіла Архангела ў Лужках, якому сёлета адзначылі 370 гадоў, а таксама сінагогу, звязаную з бацькам сучаснага іўрыту Эліэзэрам Бен-Ехудам, і палацава-паркавы комплекс Плятэраў у Гарадцы пад Лужкамі.