16/10 Прэзентацыя кнігі Андрэя Хадановіча

Літаратурны музей Максіма Багдановіча ў рамках праекта «Я кнігу маю» запрашае на прэзентацыю зборніка вершаў Андрэя Хадановіча “Школа травы”. У кнігу ўвайшлі новыя тэксты Андрэя Хадановіча, напісаныя ў 2017-2019 г. Аўтар вандруе ў прасторы і блукае ў часе, сумоўнічае з класікай і лістуецца са Святым Мікалаем, эксперыментуе ў інтымнай і фліртуе з грамадзянскай лірыкай, архівуе ўспаміны і калекцыянуе пахі травы. Цягам вечара творцы з “Five – storey ensemble” прадставяць музыку, напісаную да вершаў з кнігі і выканаюць яе разам з аўтарам. У імпрэзе таксама бяруць удзел Уладзімер Арлоў, Ігар Крэбс і Віталь Рыжкоў. Апроч тэкстаў і музыкі прысутных, будуць спробы выклікання паэтычных духаў Адама Міцкевіча і Генрыха Гайнэ, Восіпа Мандэльштама і Ўладзіміра Маякоўскага. Але сеанс спірытызму – вялікая імправізацыя, так што магчымыя “касякі”. Напрыканцы – аўтограф-сесія. Імпрэза пройдзе 16 кастрычніка. Пачатак а 19-й гадзіне. Уваход вольны. Адрас: г.Мінск, вул. Максіма Багдановіча, 7а Тэлефон для даведак: 8 (017) 334-42-69